ससुराद्वारा ज्वाइँको हत्या

केपी ढुङ्गाना, काठमाडौं, कात्तिक ७-
ओमबहालको डेरामा हत्या गरिएका दिलबहादुर थापामगरको हत्यारा उनकै ससुरा भएको रहस्य प्रहरी अनुसन्धानबाट खुलेको छ। हत्या भएको ४ दिनपछि प्रहरी नियन्त्रणमा रहेका मगरका ससुराले हत्या आरोप स्वीकारेका हुन्। छोरीसँग प्रेम विवाह गरेका ज्वाइँ मन नपरेपछि हत्या गरेको उनले बताएका छन्।

कात्तिक ३ गते पेटमा धारिलो हतियारले घोचिएको, टाउको र घुडामा चोट लागेको अवस्थामा मगरको शब फेला पारेको थियो।
प्रहरीले पारिवारिक विवादका कारण उनको हत्या भएको शंका गरेर राई थरका ससुरा र श्रीमतीलाई नियन्त्रणमा लिई अनुसन्धान गरिरहेको थियो।

मगरले राईकी छोरीसँग प्रेम विवाह गरेको र सुरुदेखि नै ज्वाइँ मन नपरेका कारण सहयोगी लिएर मगरको हत्या गरेको वयान ससुराले आइतबार प्रहरीलाई दिएका छन्।

हत्यारा खोज्न प्रहरी असफल
काठमाडौंमा जेठयता भएका आठ वटा हत्यामध्ये अझै ४ वटाको तथ्य खोल्न प्रहरी सफल हुन सकेको छैन। बौद्ध, स्वयम्भु, नयांबानेश्वर र महाराजगञ्ज क्षेत्रमा जेठयता पाँच महिला र दुई पुरुषको हत्या भएको थियो। यीमध्ये चारवटा घटनाका अभियुक्तहरु मात्र पक्राउ परेका छन्।

स्थानीय प्रहरी इकाई, महानगरिय प्रहरी परिसर र महानगरिय प्रहरी अपराध महाशाखाका अधिकारीहरु हत्याको अनुशन्धान जारी रहेको बताउँछन्। अनुशन्धानमा खटिएको प्रहरीले हत्याका आरोपीको पहिचान भएको दावी गरेपनि कोही पक्राउ परेका छैनन।

जेठ यता बौद्ध क्षेत्रमा तीन वटा हत्या भएका छन्। असोज १८ बेलुका जोरपाटी श्रृजनाचोकमा आफ्नै कोठामा सुतिरहेकी ७० वर्षिया बृद्धा सङ लामाको हत्या भएको थियो। छोराबुहारी काठमाडौं बाहिर गएका कारण उनी सात वर्षिया नातिनीसँगै बस्दै आएकी थिइन्। बालीकाको बयानको आधारमा मुखमा मास्क लगाएका २ जना ब्यक्तिले बृद्धाको हत्या गरेको खुलेपनि उनीहरुको पहिचान हुन सकेको छैन।

साउन २५ गते जोरपाटीमा खुकुरी प्रहार गरी हत्या गरेको अवस्थामा फेला परेकी २५ वर्षिया रविना विकको हत्या उनकै श्रीमान रामलाल विकले गरेको प्रहरीले दावी गरेपनि कोही पक्राउ नपरेका कारण हत्याको तथ्य खुल्न सकेको छैन।

कोठामा रामलालको नाममा रहेको 'हत्या मैले गरेको हुँ' भनेर लेखिएको पत्रको आधारमा प्रहरीले हत्यामा उनको संलग्नता रहेको दावी गरेपनि अक्षरको बैज्ञानीक पुष्टि हुन नसक्दा कोही पनि पक्राउ परेका छैनन्।

जोरपाटी क्षेत्रमै बाहिरबाट ताल्चा लगाएको अवस्थामा मृत फेला परेकी पावर्ती राईको हत्या कसले गरेको हो खुल्न सकेको छैन। प्रहरीले साउन ६ गते उनको मृत शब फेला पारेपनि लास कुहिएको अवस्थामा रहेकाले २/३ दिन अगाडि नै उनको हत्या भएको प्रहरीले अनुमान गरेको थियो।

घटना लगत्तै पार्वतीको श्रीमान् शन्तोष तामाङ फरार रहेकाले प्रहरीले हत्यामा उनीनै संलग्न रहेको आशंका गरेपनि उनी पक्राउ नपरेकाले पुष्टी गर्न भने सकेको छैन।

बौद्ध बृत्तका प्रमुख गोविन्द परियार राई र विकको हत्यामा संलग्नको पहिचान खुलेको तर,लामाको हत्याको बारे अनुशन्धान जारी रहेको बताए। उनले हत्यामा संलग्न रहेका अभियुक्तहरुको पहिचान र पक्राउका लागी बृत्तले टोली गठन गरी परिचालन गरेको दावी गर्दै भने 'सबै घटनाको कारण खुलिसकेको छ, अभियुक्तको खोजीमा छौं।'

५६ वर्षिया रामदेवी सक्सेनाको हत्या कसले गरेको हो? पाँच महिनापछि पनि गुत्थी सुल्झाउन प्रहरी असफल छ। उनी जेठ २३ गते बसुन्धरा सिर्जनचोकस्थित घरको तेस्रो तल्लामा मृत अवस्थामा फेला परेकी थिईन। हातको नसा काटिएको र गलामा डाम भएको अवस्थामा शव फेला परेको सक्सेनाले आत्महत्या गरेकी हुन् या हत्या भन्ने निष्कर्षमा पुग्न प्रहरीले एक महिना लगाएको थियो।

एक महिनापछि सक्सेनाको हत्या नै भएको निष्कर्षमा पुगेको महानगरिय प्रहरी बृत्त महाराजगञ्जले उनको हत्यामा संलग्नहरुको पहिचान समेत गर्न सकेको छैन। मृतक सक्सेना र उनका श्रीमान् ओमप्रकाश सक्सेनाबीच अंश विवाद रहेको र दुवै हत्याको अभियोगमा जेल सजाय काटेर भर्खरै मुक्त भएको देखिएपछि सुरुमा प्रहरीले ओमप्रकाशलाई नियन्त्रणमा लिएको थियो। उनलाई हाजिर जमानीमा रिहा गरेपछि प्रहरीले अन्य कसैलाई पक्राउ गर्न सकेको छैन।